अखण्ड सुदूरपश्चिम एकता समाजले हिजोबाट गरेको दोश्रो चरणको अनिश्चितकालिन सुदूरपश्चिम बन्दले जनजीवन प्रभावित भएको छ । 
यसअघि, सरकारले आफूहरूसग सेती(महाकाली मिलाएर अखण्ड सुदूरपश्चिम प्रदेश बनाउने सहमति गरेपनि आदिवासी जनजाती र थारूसग कैलाली कञ्चनपुरलार्इ छुटट्याउने गरी सहमति गरेको भन्दै अखण्डपक्षधरले पुन: आमहड्ताल शुरू गरेका हुन् । सहमतिको विरोधमा आज पनि उनीहरूले कैलालीको धनगढीमा बृहत प्रदर्शन गरे । मुलुकलाइ एकल जातीय पहिचानसहितको संघीयतामा लैजाने निर्णयको विरोधमा पुन: आमहडताल सुरू गर्नु परेको अखण्ड सुदूरपश्चिम संघर्ष समितिले जनाएको छ । यसअघि २१ दिनसम्म बन्द गरेको अखण्ड सुदूरपश्चिम एकता समाजले बिहीबारबाट पुन: आमहडताल सुरू गरेको हो । बन्दको पूर्ण प्रभाव कैलाली र कञ्चनपुरमा परेको छ । बन्दकर्ताले सरकारी कार्यालय बन्द गराउनुका साथै रिक्सा र सार्इकलसमेत चल्न दिएका छैनन् । यसैबीच आमहड्तालका कारण असहज परिस्थिति सिर्जना भएको भन्दै आजदेखि कैलालीबाट प्रकाशित दैनिक पत्रपत्रिका अनिश्चितकालका लागि बन्द भएका छन् ।
