स्वायत्त गणराज्य घोषणा कार्यक्रम फिर्ता लिनुअघि खोटाङमा माओवादी कार्यकर्ताले तयार पारेको साइनबोर्डः तस्वीर सुनिता र्राई

एकीकृत नेकपा माओवादीले स्वायत्त गणराज्य घोषणा गर्ने पूर्व निर्धारित आन्दोलनको कार्यक्रम फिर्ता लिएको छ । नागरिक सर्बोच्चताका लागि घोषित दोस्रो चरणको आन्दोलनको कार्यक्रम अन्तर्गत एकीकृत नेकपा माओवादीले यहि कात्तिक २३ गते स्वायत्त गणराज्य घोषणा गर्दै साइनबोर्ड राख्ने कार्यक्रम तय गरेको थियो । क्रान्तिकारी पत्रकार सङ्घ ईलामले आज विहान ईलाम सदरमुकाममा गरेको पत्रकार सम्मेलनमा एकीकृत नेकपा माओवादीका अध्यक्ष प्रचण्डले स्वायत्त गणराज्य घोषणा गर्ने कार्यक्रम हाललाई स्थगित गरिएको जानकारी दिनुभयो ।

एकीकृत माओवादीले समानान्तर सत्ता चलाउन थालेको हल्ला फैलाइएकोले स्वायत्त गणराज्य घोषणा गर्ने कार्यक्रम तत्कालका लागि फिर्ता लिइएको उहाँले बताउनुभयो । राष्ट्रिय, अन्तराष्ट्रियस्तरमा गरेको छलफलका आधारमा गणराज्यलाई प्रचारात्मक मात्र बनाउन उपयुक्त नहुने निष्कर्ष निकालेर कार्यक्रम फिर्ता लिइएको प्रचण्डको भनाई थियो ।

यसअघि अन्तराष्ट्रिय दवावका कारण यही २४ गतेका लागि निर्धारित हवाई नाकाबन्दी गर्ने आन्दोलनको कार्यक्रम अन्तर्गत अन्तराष्ट्रिय उडान बन्द गर्ने कार्यक्रम पनि माओवादीले फिर्ता लिइसकेको छ ।