पत्रकारको सुरक्षा र प्रेस स्वतन्त्रताको विषयमा राज्य गम्भीर नभएको आरोप पेशाकर्मी तथा नागरिक समाजका सदस्यहरुले लगाएका छन ।

नेपाल पत्रकार महासंघले बिहीबार राजधानीमा आयोजना गरेको अन्तरक्रिया कार्यक्रममा बोल्दै उनीहरुले मुलुकमा प्रेस स्वतन्त्रताको अवस्था जटिल रहेको भन्दै पत्रकारहरुलाई यो मुद्दालाई लिएर आफ्नो आन्दोलन जारी राख्न सुझाव दिएका छन् । उनीहरुले पत्रकारमाथिको आक्रमणको घटनामा राज्य गम्भीर नहुँदा र दोषीमाथि कारवाही नहुँदा पत्रकारमाथिको आक्रमणको घटना बारम्बार दोहोरिएको बताए ।
नेपाल पत्रकार महासंघका सभापति धर्मेन्द्र झाले राज्यले संस्थागत रुपमा दण्डहीनतालाई प्रश्रय दिइरहेको आरोप लगाउनुभयो । प्रेस काउन्सिलका अध्यक्ष नारायण शर्माले पत्रकार असुरक्षित हुनु् भनेकै आम नागरिक असुरक्षित हुनु रहेको बताउनुभयो ।
रुकुमकी पत्रकार टिका विष्टमाथि आक्रमण भएपछि प्रेस स्वतन्त्रता र पत्रकार सुरुक्षाको माग गर्दै पत्रकार महासंघ विगत एक सातादेखि आन्दोलनरत  छ ।