गृहमन्त्री भीम रावलले सशक्त रुपमा निडर र साहसिक भएर काम गर्न सुरक्षा अधिकारीलाई निर्दशन दिनुभएको छ । मन्त्री रावलले सुरक्षाकर्मीलाई सुविधा तथा सहयोग दिन सरकार तयार रहेको आश्वासन दिनुभयो ।

विशेष सुरक्षा योजना अनुगमन गर्न बिहीबार दिक्तेल आउनुभएका मन्त्री रावलले दिक्तेलको हाटडाँडा र चिसापानीस्थित सुरक्षा बेसक्याम्प निरीक्षण गर्नुभयो । निरीक्षणपछि पत्रकारहरुसँग कुरा गर्दै मन्त्री रावलले विशेष सुरक्षा योजना प्रभावकारी ढङ्गबाट कार्यान्वयन भएको दाबी गर्नुभयो । सशस्त्रका प्रहरी निरीक्षक जोगेन्द्र केसीले सुरक्षा बेसक्याम्प स्थापनापछि जिल्लाको सुरक्षास्थिति मजबूत भएको जानकारी गरायँदै किराँत जनवादी वर्कस सहितका समूहको गतिविधि कम भएको दाबी गर्नुभयो ।