काठमाडौं, २५ फागुनसमयमै संविधान जारी हुनुपर्ने माग गर्दै नागरिकहरुले संविधान सभास्थल बानेश्वरमा मंगलवार धर्ना र नागरिक सभा मार्फ खबरदारी गरेका छन् । उनीहरुले तोकिएको समयमै संविधान जारी हुनुपने माग गर्दै यसअघि पनि पटक पटक धर्ना र जुलुसहरु गर्दै आएका छन् । मंगलबार दिउँसो २ बजेदेखि शुरु भएको धर्ना र खबरदारी सभामा बिभिन्न जिल्लाबाट आएका नागरिकहरु पनि सहभागी भएका थिए । संविधानसभाले संविधान जारी गर्ने कार्यतालिका दशौं पटक संशोधनका लागि बैठक बस्नुअघि नागरिकहरुले सभा भवन अगाडि धर्ना दिएका थिए ।

मनोरञ्जन शर्मा भैरहवा,२५फागुन । दुई हप्ता अघि काठमाडौंमा सम्पन्न आईसीसी वल्र्ड लिग डिभिजन ५ ,२०१० प्रतियोगितामा बिजयी नेपाली टोली सदस्यहरु मध्ये क्षेत्र नम्बर ४ भैरहवाका चारजना क्रिकेटर र टिमका सहायक प्रशिक्षकलाई आज भैरहवामा सम्मान गरीएको छ । उक्त प्रतियोगिता भरी उत्कृष्ट प्रदर्शन गरी आफुहरुलाई नायकका रुपमा उभ्याउन सफल खेलाडीहरु शक्ति गौचन, बसन्त रेग्मी, राहुल कुमार बिक, अमृत भट्टराई र नेपाली टिमका सहायक प्रशिक्षक जगत टमाटालाई क्षेत्रिय क्रिकेट विकास समिति क्षेत्र नम्बर चार भैरहवा र जिल्ला क्रिकेट संघ रुपन्देहीले आयोजना गरेको संयुक्त कार्यक्रममा नगद पुरस्कार सहीत सम्मानित गरीएको हो ।

उपराष्ट्रपति परमानन्द झाले हिमाल, पहाड र तराइको समान विकास नगरेसम्म देश सम्बृद्ध नहुने भएकाले अब तेरो मेरो नभनी सबै क्षेत्रका विकासमा लाग्नुपर्ने धारणा व्यक्त गर्नुभएको छ । यसअघि आफुलाई मधेशी जताले उपराष्ट्रपति बनाएको बताउने उपराष्ट्रपतिले पछिल्लो समयमा आएर आफूलाई पहाड र हिमालका जनताको पक्षमा उभ्याउन खोज्नुभएको विश्लेषण गरिएको छ । आइतवार र सोमवार पोखरामा आयोजित बिभिन्न कार्यक्रममा सहभागी बन्नुभएका उपराष्ट्रपतिले तराइको तुलनामा पहाड र हिमालका जनता भौतिक विकासमा धेरै पछाडि रहेको बताउनुभयो ।

एकीकृत नेकपा माओवादीका अध्यक्ष एबं पूर्व प्रधानमन्त्री पुष्पकमल दाहाल प्रचण्डले वर्तमान सरकार कुहिएको फर्सी हो भन्नुभएको छ । उहाँले कुहिएको फर्सीले अरुलाई पनि दुर्घन्धित पार्छ भन्दै वर्तमान सरकार नढालेसम्म संविधान जारी नहुने समेत बताउनुभएको छ । एक सयौं अन्तर्राष्ट्रिय श्रमिक महिला दिवसका अवसरमा सोमवार काठमाडौंको खुल्ला मन्चमा आयोजित आमसभालाई सम्बोधन गर्दै अध्यक्ष प्रचण्डले कुहिएको फर्सी खस्नमात्र बाँकी रहेको बताउनुभयो ।